Feeds:
Artigos
Comentarios

Archive for the ‘Varia’ Category

Manifesto

     Sempre escoitamos falar nas noticias de sucesos coma este pero nunca nos sentimos tan cerca deles; é agora cando mellor comprendemos o que se sente.

     Pensando na gran cantidade de noticias sobre as mulleres que son vítimas da violencia de xénero no noso país, dámonos conta de que o sentimos todo moi lonxe, tanto, que chega a parecernos irreal en moitos casos. Pero unha vez que vives isto tan de cerca, dáste conta de que esas situacións se producen realmente, e que non son exclusivas de certa clase de persoas, senón que afectan a todos por igual. Pensamos que é necesario un cambio urxente na mentalidade das persoas, porque aínda que legalmente case que se pode falar de igualdade entre persoas de diferente sexo, na realidade, os tópicos seguen gravados na mentalidade da maioría das persoas, incluso inconscientemente. Debemos cambiar nós antes que intentar cambiar a toda a sociedade. Empezar por nós mesmos e conseguir que o mundo enteiro se despoxe dos tópicos que impiden o cambio para construír entre todos/as unha sociedade igualitaria, real e que facilite o desenvolvemento de relacións solidarias entre homes e mulleres.

     Gloria foi alumna do IES “Campo de San Alberto”. Moitos de nós non a coñeciamos pero compartimos con ela o noso instituto, a nosa vila… Aínda que non poidamos dicir moito, si queremos transmitir a tristura que sentimos polo que aconteceu e o noso apoio á familia e aos máis achegados a ela.

     Non temos palabras para describir o que sentimos, estamos abraiados co suceso. Só podemos dicir que sentimos moito o que pasou o venres e queremos darlle o noso pésame e todo o noso apoio á familia de Gloria e aos seus achegados, en especial a Adrián , o noso compañeiro. Sabemos que agora necesitas do noso apoio xa que imaxinámonos que estás pasando polo peor momento da túa vida. En nome de todos os alumnos/as, profesores/as e o resto da Comunidade Educativa deste centro dámosche o noso máis sentido pésame e dicímosche que podes contar con nós se o precisas.

19/05/2011

IES “Campo de San Alberto” 4º ESO

Read Full Post »

“Vento Lois” é unha proposta para difundir a figura do poeta ás 8 da tarde do xoves 12 de maio onde queira que esteas, realizando calquera acto que teña que ver coa obra do autor.
Como ás 8 da tarde non é tempo lectivo, nós ímolo facer pola mañá.
Os dous institutos de Noia sacarán un grupo de alumnos/as á rúa e con xices irán pintando os versos de Lois por toda a vila, para que todo o mundo poida ler o que o autor, a quen se lle adica este ano o Día das Letras, escribiu.Trátase dunha iniciativa do EDLG do IES Campo de San Alberto a quen se une o IES Virxe do Mar e que realizaremos coa colaboración do Concello de Noia.
Os versos permanecerán nas rúas de Noia ata que as inclemencias do tempo e as pegadas dos transeúntes os vaian levando.

Read Full Post »

Roberto Brenlla

Roberto Brenlla

O día 3 de Maio estivo connosco o economista Roberto Brenlla, para falarnos do controvertido tema do copyright vs. copyleft, e o uso de licenzas Creative Commons nos diferentes ámbitos, en particular no ensino.

Para comezar fixo un repaso á historia do Copyright, dende os tempos da invención da imprenta por Gutenberg, en 1450, ata os nosos días.

Logo disto, centrouse nos dereitos de autor, tal e como están concebidos na lexislación actual. A este respecto, explicou as diferenzas entre os dereitos morais e os dereitos de explotación dunha obra. Dentro dos dereitos morais, abríu un pequeno debate sobre quen posúe estes dereitos para diferentes situacións. En canto aos dereitos de explotación, enumerou e describíu os catro subtipos de dereitos, que son o dereito de reprodución, o dereito de comunicación pública, o dereito de transformación e o dereito de distribución, conceptos importantes para logo entender as diferentes opcións de licenzas Creative Commons que podemos elixir para os nosos traballos.

Seguidamente, e para glosar as posibilidades que ten un autor ou grupo de autores sobre a súa propia obra, puxo o exemplo das diferentes licenzas que se usan para a publicación de software (programas informáticos), como son as licenzas privativas (tódolos dereitos reservados) e as licenzas libres (só algúns dereitos reservados). Dentro destas últimas, explicou a diferenza entre a licenza GPL (tamén coñecida como copyleft – exemplos son GNU/Linux, LibreOffice, o GIMP, vlc, inkscape, audacity, etc.) e a BSD (non copyleft – exemplos: freeBSD, postgreSQL, etc.).

Para finalizar, pasou a explicar en que consisten as licenzas Creative Commons (de aquí en adiante licenzas CC), e as diferentes combinacións que se poden elixir. Estas combinacións son en base a 4 opcións que supoñen unha restrición no uso da obra por terceiros.

A primeira opción (restrición) é a de Recoñecemento (Atribución), que no caso dos países europeos é obrigatorio incluíla (non se permite poñer unha obra no dominio público, aínda que esa sexa a vontade do autor/autores). Toda obra con licenza CC que conteña a opción Recoñecemento obriga, a quen a divulgue ou modifique (no caso de que teña permiso para elo), a recoñecer ao autor ou autores orixinais desa obra.

A segunda opción é a Non Comercial. Se o autor ou autores da obra elixen esta opción, entón non permiten que se use a obra ou modificacións dela para fins comerciais. Naturalmente, se non se inclúe esta opción dentro da licenza, implica que o autor ou autores da obra permiten o uso comercial da mesma.

A terceira opción e a de Sen obras derivadas. Aqueles autores que opten por incluír esta restrición estarán impedindo que ninguén poida facer modificacións, retallamentos, engadidos, versionados, adaptacións, etc. da súa obra.

Por último, a cuarta opción é a de Compartir Igual. Cando se inclúe esta opción na licenza CC dunha obra, obrígase a quen faga modificacións da obra, a copie ou a distribúa, a que o faga baixo a mesma licenza que tiña a obra orixinal. Esta opción provoca, polo tanto, a herdanza nos dereitos e deberes, por así dicilo, que o autor orixinal elexíu para a súa obra.

Como exemplos se citaron:

a) Wikipedia e OpenStreetMap: Licenza CC – Recoñecemento – Compartir Igual. Isto implica, con respecto á Wikipedia, que un pode facer copias de cantos artigos queira, distribuílos libremente, facer modificacións e obras derivadas de todo tipo, e incluso vender esas copias e/ou traballos derivados, coas únicas restricións de que debe: 1) Recoñecer a autoría orixinal (Wikipedia.org) e 2) compartir as copias ou traballos derivados con esa mesma licenza. Esta licenza é a equivalente á licenza GPL que temos para o software (programas informáticos).

b) Licenza CC – Recoñecemento – Non Comercial – Compartir Igual. Tamén bastante popular, engade a restrición de que non se pode facer uso comercial da obra nin de traballos derivados dela.

c) Licenza CC – Recoñecemento. Esta é unha licenza moi pouco restrictiva, pois só obriga a recoñecer a autoría da obra. Se un fai unha obra derivada dela, pode restrinxir o uso desas modificacións sen ningún límite. Esta licenza é a equivalente á licenza BSD no mundo do software.

d) Licenza CC – Recoñecemento – Non Comercial – Sen Obras Derivadas. Se incluímos esta licenza, só permitiremos a copia e distribución da nosa obra, sen modificación ningunha e sen ánimo de lucro.

Para máis información, poden consultarse todas as licenzas cara ao final desta páxina web.

O relatorio finalizou cun pequeno debate sobre as friccións dos dereitos de propiedade intelectual cos dereitos dos cidadáns desde a chegada de Internet, a falta de oferta para a descarga “legal” na rede, o dereito de acceso á cultura dos cidadáns por un lado, e os intereses da industria do entretemento por outro, etc. Un tema de rabiosa actualidade e que daría para falar moito máis, sen dúbida.

[A presentación de Roberto Brenlla que usou no relatorio pode descargarse aquí. Ten licenza CC Recoñecemento – Compartir Igual]

Read Full Post »

 O xoves 5 de Maio Abraham Carreiro veu a ensinarnos tipos diferentes de debuxos e algúns trucos para debuxar mellor. Primeiro ensinounos como facía el e logo puxémonos mans á obra. Cada personaxe ten que ter a medida de 7 cabezas de debuxamos calquera personaxe que se nos ocurrira en diferentes medidas. O máis fácil foi inventar os ollos, a boca … e o máis difícil, tentar debuxalo exactamente como o imaxinamos. Gustounos moito este obradoiro de Abraham Carreiro porque para nós debuxar é moi importante, e máis se é divertido.

Alicia Fontenlos e Elvira Cadarso, 1º A

Read Full Post »

Nova obra visual de Jorge García Valenciano e Gerardo Rodríguez, baseada na actividade de recollida de obxectos curiosos deixados polo mar “Todos os mares“.

Read Full Post »

Colaboración coa Asociación Cultural Barbantia:

Dende a Asociación Cultural Barbantia puxéronse en contacto co noso centro para convidar ao alumnado a colaborar no suplemento cultural A Voz de Barbantia, que se distribúe nas páxinas do xornal La Voz de Galicia, edición do Barbanza, o último venres de cada mes dentro da nova sección “En obras”. Aceptamos e o 29 de Abril publicouse o conto “ Os nomes dos meus amigos”, de Miriam López de 1º C de Bacharelato. Noraboa, Miriam!

W

Vin os nomes dos meus amigos …

        Todo estaba moi escuro, escoitábase ata a respiración de Claudia…
        Todo empezara hai tres días.

        Somos un grupo de tres rapazas e dous rapaces; meus amigos chámanse: Claudia (a miña mellor amiga), Ana, Diego, Alex e mais eu, Vitoria. Todos somos de 4º da E.S.O.
        Un día escoitamos a uns de bacharelato falar dun bosque no que ocorreran varios suicidios ou algo así. Contaban unha historia que non nos gustou nada e para demostrar que iso non era verdade, Diego, quen sempre fai as cousas sen pensar, díxolles que nós os cinco iriamos ese mesmo sábado para que viran que non pasaba nada. Nós, que non somos moi valentes, botámoslle un berro a Diego pero axiña nos convenceu.

(máis…)

Read Full Post »

Older Posts »