Feeds:
Artigos
Comentarios

Archive for the ‘Ciencia e tecnoloxía’ Category

O día 13 de maio de 2011, Salvador Bara, físico e profesor da Universidade de Santiago de Compostela, acudiu ao IES Campo de San Alberto para mostrarnos un novo programa informático, Stellarium, que nos permite ver e estudar o ceo con facilidade polo seu sinxelo manexo. Foi unha hora a que pasamos con el, unha hora na que estivemos máis cerca do ceo do que nunca imaxinaramos. No ceo hai escritas historias de todo tipo, historias que se contan nos máis famosos libros e mitos da Antigüidade. Encóntranse formas idílicas e tamén seres que poden chegar a ser os protagonistas dos nosos pesadelos.

Todo isto fixo que me detivese a pensar que as mesmas estrelas que hoxe vemos foron testemuñas de masacres, batallas épicas, milagres, descubrementos, e, sobre todo, a inspiración dos máis grandes artistas. Engádenlle poesía e beleza á abraiante marabilla do Universo testemuñando as inquedanzas humanas.

Ao final da reunión, encomendóusenos facer unha tarefa relacionada coas estrelas e a mitoloxía grecolatina. Dividímonos en grupos de 4 para traballar sobre unha constelación, tivemos que fotografala e investigar a súa historia e mitoloxía. Foi unha experiencia enriquecedora, divertida e, sobre todo, digna de repetir.

Alba Patiño Díaz, 4º ESO A.

Read Full Post »

Os alumnos de Bioloxía de 3º da E.S.O querémosvos presentar unha páxina sobre o APOD galego. E preguntarédesvos, que é o APOD galego? Pois o APOD galego é a versión galega do Astronomical Picture Of the Day da NASA. Unha páxina onde se publica diariamente información da NASA dende 1995. A información que contén é toda en galego.
A páxina conten arquivos e categorías para unha busca máis fácil. No apartado de categorías podemos atopar información sobre a Terra, estrelas, galaxias, sistema solar, vía láctea etc.

Nebulosa Trífida, imaxe de hoxe no APOD galego.

Enlace da páxina: APOD galego

  • Alumnos de 3º da E.S.O non bilingüe.

Créditos da imaxe: CopyrightR Jay Gabany

Read Full Post »

Jorge MIRA2_crop_51x68

Conversando cun alumno ao final da charla

O día 26 de Abril estivo connosco o catedrático de física Jorge Mira, bastante coñecido pola súa colaboración en medios de comunicación.

Comezou a conferencia cunha breve explicación sobre a evolución da sexualidade humana. A continuación expúxonos unha polémica reivindicación sobre a estrita lectura da Biblia que publicara anos atrás a través dunha demostración científica. Finalmente pechou a conferencia coa reseña dunha serie de curiosos premiados por descubrimentos científicos.

Ao acto asistiu o alumnado de 1º e 2º de Bacharelato e o de 4º da ESO.

José Manuel Busto 2ºA Bach.

Read Full Post »

taboleiro-tecno_800
c-parafuso_ct_800No taboleiro de normalización dinamización da lingua (galega) caeu unha folerpada de termos tecnolóxicos, e nos corredores e por todos os recunchos do instituto apareceron cartolinas cos nomes dunha morea de aparellos e enxeños.

Parece ser que a ocorrencia foi tomada da páxina “Revoltallo de termos” do sitio tecnoloxia.org e que os letreiros foron confeccionados na aula de plástica.

Read Full Post »

Como acto para conmemorar a “Xornada pola ciencia en galego” o profesor deste centro Rafael Ávila Coya impartiu un relatorio sobre a plataforma OpenSreetMap.org, o mapa mundial libre, coa asistencia de alumnado de 1º de bacharelato e do segundo ciclo de ESO.

RelatorioOpenStreetMap_420

Esta ferramenta foi ideada polo enxeñeiro informático Steve Coast, motivado pola imposibilidade de corrixir erros nos mapas dispoñibles en internet da súa zona de residencia.

Neste centro o uso e participación en OpenStreetMap comezou coa elaboración dunha Guía non oficial de Noia por parte do alumnado das Ensinanzas de Adultos dentro do programa Grundtvig, tamén impulsados pola necesidade de corrixir erros e incoherencias lingüísticas nos mapas dixitais privativos.

Seguramente a mostra máis importante e irrebatible da importancia dun mapa aberto e colaborativo en internet deuse con ocasión da axuda ás vítimas do terremoto de Haití o pasado mes de xaneiro, tal como se recolle neste artigo de Agnix.org.

Outro bo exemplo é o mapeo para proxectos humanitarios de barrios marxinais das grandes cidades que na cartografía oficial e privativa aparecen coma espazos en branco, como é o caso do barrio de Kibera en Nairobi (Kenia).

A máis de traballos e traxedias, OpenStreetMap sérvenos tanto para preparar unha viaxe a calquera parte do mundo como unha pequena excursión en bicicleta.

Mapa ciclista Noia_500

Mapa dos arredores de Noia coa renderización «mapa ciclista»
Preme na imaxe para velo en OpenStreetMap

E o fundamental: todos podemos utilizalo libremente e todos podemos colaborar.

Read Full Post »

revoltalloXa está en marcha a Xornada pola Ciencia en Galego do 4 de novembro, unha xornada dirixida dende o ensino a toda a sociedade galega, para defender a idoneidade do uso do galego nas áreas científico-tecnolóxicas, comunicarlle á sociedade o orgullo de expresar ciencia e tecnoloxía en galego e divulgar experiencias científicas e tecnolóxicas pensadas e desenvolvidas en galego.
En coordinación coa CENDL e apetega, tecnoloxia.org súmase coa actividade Revoltallo de termos. A tecnoloxía en Galego, iniciativa que pretende dar a coñecer e difundir vocabulario técnico existente na nosa lingua, perfectamente válido para expresar e difundir tecnoloxía.

Read Full Post »

Older Posts »